Ang makainuman ka

kasama ang isang malamig na pale pilsen
ay mas maaliwalas sa pakiramdam kesa sa amoy ng hinog na palay sa bukirin
o kaya naman ng amoy ng mga bagong buka na bulaklak ng mangga sa umaga
Mas kapanapanabik kesa sa paghihintay na lumubog ang araw sa dalampasigan
o pagpili ng mga pinakamaniningning na mga bituin sa hatinggabi.

Ang kwentuhan kasama ka  at ng isang boteng serbesa
ay mas masarap kaysa sa pinakamalasang embutidong manok sa pyestahan sa aming bayan
o kaya mas nakakapatid uhaw kesa sa tubig mula sa pinakabatang niyog sa may kapatagan.

Mas nanaisin ko na kasama ka ngayon
Kesa manalo ako sa Palanca
O kaya mabigyan ng pagkakataon na humigop ng espresso ng Italya.
Hindi ko ipagpapalit ang pagkakataon na ito
Sa alin mang ganda ng pagkakataon na libutin ang mundo,
pati na ang pagsilip sa mga sinaunang gusali sa Gresya.

Mas pipiliin kong makinig sayo at tanging sayo
Ang mga kwento ng karanasan mo kaninang umaga sa pagsakay ng tren
At sa sinabi mong paghahalo ng amoy ng usok ng sigarilyo ng katabi mo sa dyip sayong buhok
Kesa hindi ka makasama ngayong gabi.

Ang makainuman ka
ang tanging magandang nangyari sa akin nitong nakaraang tatlong taon
na hindi tayo nagkita.
At kung pwedeng ulitin ito ay nanaiisin ko
higit sa kahit ano pa man
na pwedeng ipagkalooob ng  mundong ito
na walang saysay kung hindi kita makakasama.