Diskrit na nasa 2

Gaano katagal,

ilang gabi,

o buwan,

o semestre,

bago limutin

ang minsang

mahigpit na

yakap ng kamay mo

sa kamay ko?

Naratibo ng piksyunal na buhay ko kapag retirado nako

Kapag retirado nako

Sa unibersidad bilang propesor

Maglalakad na ako

Sa academic oval

Na may malakas na speaker

Na nakasukbit sa aking backpack

At papatugtugin ko ng malakas

Ang waltz of four left feet ni

Shirebound and Busking.

Susuutin ko ang pinaka- nagsusumigaw

Na orange shirt na pwede ko bilhin.

At pinakamahal na 

carbon plated running shoes

Na mayroon sa Kamaynilaan.

Hindi ako tatakbo

Pero mabagal

Na mabagal

Na mabagal

Na maglalakad. 

Para dinig ng mga nagsusuyuan

Sa oval ang musika na dala ko

At kitang kita ang 

Karumaldumal na kamiseta ko

Habang naglalaway ang ilan

At nanghuhusga sa pangyapak

Na kayang bilhin

Ng isang retiradong 

Nagmumurang kamatis na katulad ko.

Hindi ko na kailangan 

Isipin kung malalathala ba ako

Sa tagong identidad ng mga lintik

Sa reddit at iba pang ukininam

Na anonymous platform.

Hindi ko na kailangan

Maging mabuting halimbawa 

Sa mga estudyanteng ambivalent

Kung makamasa o makasarili.

At mga batang fakulti 

Na nagsusumikap umakyat 

Sa kung anumang hulma

Ng karera sa akademya.

Hindi ko na kailangan

Maging simbolo ng institusyon--

Primyadong, pambansang institusyon.

Bibili ako ng fishball

At makikiusap sa tindero

Na hatiin ang bawat fishball sa apat

At idadahilan na

Mahina na ang aking bagang

Kahit na sa totoo lang ay gusto 

Ko lang mang abala

Sa walang saysay na mga bagay.

At kapag sinunod niya ako

Ng maalwan

Magbabayad ako ng sobra

At sasabihin na

Keep the change.

At kung hindi naman ay

Itatanong ko kung may senior discount

At kung wala

Ay susulat ako sa 

Bise tsanselor para sa gawaing pangkomunidad

Para ilatag ang di pagsunod ng 

Mga manininda

Sa pambansang patakaran

Para sa mga senior sitisens.

Isipin niyo 

Primyadong, pambansang institusyon

Hindi sumusunod sa batas.

Hahagalpak ako ng tawa.

Madami na akong oras

Para magganito.

Pero ngayon,

Magiging bukas muna ako sa 

Pormal na feedback ng mga estudyante

Sa akong pagtuturo 

At susubukan na mag adjust

Sa kanilang learning style.

Magiging modelo muna ako

Ng student-centered teaching at learning.

At magiging mabuting akademiko

Na pwedeng sundan ng mas nakababata.

Hindi kakain ng fishball 

Kasi empty calories

At kailangan na maging malusog ang katawan.

Gagamit muna ako ng earphones 

Kung gusto ko makinig ng musika

Ni shirebound and busking.

Kapag maglalakad ako

Doon ako sa bangketa

Para di abala sa publiko na gusto 

Tumakbo sa oval.

Respetadong pagbabahagi ng espasyo

Para sa lahat.

Pero ano kaya

Kung magsimula na ako

Magsuot ng pinaka- nagsusumigaw

Na orange shirt na pwede ko bilhin.

Para di naman magulat

Ang mga tao

Kapag retirado nako

Sa unibersidad bilang propesor.

Diskrit na nasa 1

Sa ilang nakaw

na sandali

sa pagpuslit at

pagkubli,

Ilang sipat sa

kanan

at kaliwa

kung may makakahalata.

Naalala ko

ang pagtatago

at pagtawa ng tahimik

pagngiti,

kilig at kiri

na dulot ng

kaunting dikitan

ng balikat at braso.

.

..

...

Kailan kaya?

Kailan

ulit kaya?