Bad day ng co-faculti, warehouse sale at konsumerismo

Masama ang araw para sa co-faculti ko. Rowdy yung mga bata niya sa preschool noong umaga. Hindi gumana yung LCD projector na tangan niya para sa klase sa kolehiyo noong hapon. Hindi rin engganyo ang mga undergrad na bagets sa diskusyon. (Isang struggle talaga sa isang instraktor na maging excited sa klase pero walang paki yung mga estudyante. Parang maya't maya ay binubuhusan ng malamig na tubig yung faculti na nagsusubok magbigay ng magandang lektyur sa unahan ng klase.) Sayang. Maganda pa naman ang kursong tinuturo niya -Malikhaing Karanasan para sa mga Bata, isang major sabjek. Tapos, habang naglalakad siya, bigla na lamang siya natapilok at nakita ng maraming tao.

Syempre, kapag ganyan na ang karanasan at pakiramdam ng co-faculti ko, niyayaya ko na yan na samahan gawin ang kung anuman ang gusto niyang gawin. Sabi niya punta daw kami sa National Bookstore sa may Quezon Avenue. Warehouse sale kasi ng mga bagay-bagay. Hanggang 80% ang discount. Shopping ang lunas sa masamang araw ni co-faculti. Ayun, alam kong magiging riot pero napasubo na e.

Ito ang tumambad sa amin sa ikaapat na palapag kung nasan ang warehouse sale ng NBS.

Walang basket na available. Ang tangan ng mga tao ay mga malalaking kahon. Magulo ang pagkakasalpak ng mga libro at office supplies. Palagay ko dahil hindi marunong magsalansan ang mga costumer. Naging para siyang ukay-ukay ng mga brief, panty at bra. Halo-halo.

Naghiwalay na kami ni co-faculti. Siya nawala sa realidad na masama ang araw niya nung nakita niyang nasa 50% off ang mga librong pambata na pwede niyang gamitin sa preschool. Ako naman ay natuliro at nagsubok mag-ayos ng mga librong hinahalughog ng mga costumer. Pinagsamasama ko yung parepareho ang author tapos dinidisplay na parang sa sari-sari store, yung madaling makita at malinis tingnan sa mata. Pinupulot ko rin yung mga nalalaglag na libro. Ganyan. Napagod ako ng dalawang oras na ayun ang ginagawa.

Wala akong nakitang gusto kong mga nobela. Mukhang naransak na ng mga taong nauna sa akin. Basta ako nagsubok mag ayos ng buhay ng mga libro. Masaya na ako doon.

Matapos ang dalawang oras, nagkita ulit kami ni co-faculti at pumili ng isang oras sa linya para magbayad. May mahigit pitong cashier. Pero mabagal. Ganun kasi kadami yung mg taong nakapila para magbayad. At ganun din kadami ang biniling libro ng mga tao. Literal na kahon-kahon.

Naalala ko ang konsepto ng konsumerismo --ito yung paggawa ng ideya at pagkakaton sa mga tao na bilhin ang mga bagay na hindi naman nila kailangan. Ang daming hindi kailangan ng stapler. Pero dahil nagbagsak presyo, marami ang bumili ng kahon-kahong stapler. Ganun.

Habang nasa warehouse sale ako, nagtuteorya ako. Ganun.

Nag-ooverthink na naman ako.