Regular calibration

Kung kinumusta mo sana ako kagabi, nasabi ko sayo na ilang gabi akong lasing. Nakwento ko sana sayo na hindi ako umuwi ng Aurora. At naglakad ako sa buong kahabaan ng EDSA para mag-isip. Nakwento ko sana sayo na alam ko na ang lasa ng cheap sex. At hindi siya masaya.

Kung kinumusta mo ako kagabi, nasabi ko sana sayo na may bago na akong paboritong tambayan dahil sa legit unlimited mojito nila. Na gusto kitang dalhin doon para makakwentuhan at mahawakan ang mga maninipis mong daliri. Nasabi ko sana sayo ang pangalan ng pribadong espasyo na yun na hindi lapitin sa publiko.


Kung nagtanong ka lang, nakwento ko sana sayo kung paanong sumakit ang paa ko dahil hindi walking shoes ang suot ko noong binagtas ko ang EDSA nitong mahal na araw. Nailarawan ko sana kung paanong may kaba ako noong nagdesisyon akong maglakad ng alas onse ng gabi. Na akala ko, may lalapit sa akin para mangholdap pero wala namang ganun. Na ang kaba ng paglalakad mag-isa ay napalitan ng kamalayan sa mga istraktura at detalye ng EDSA na di ko napapansin tuwing bumabyahe ako papuntang opisina. Nasabi ko sana sayo ang mga bagay na pinag-iisipan ko nitong mga nakaraang linggo na hindi ko sinabi kahit kanino. Na alam kong ikaw lang ang makakaintindi.

Kung kinausap mo sana ako noong nagkita tayo kagabi, nasabi ko sana sayo na nakatikim na ako ng puta. Na hindi masaya ang seks na ang ending ay abutan ng pera. Na parang walang saysay ang pagsiping sa taong wala kang relasyon o pakiramdam. Na nandidiri ako sa sarili ko sa pagpayag sa cheap sex. Na gusto ko sana sisihin ang alak na nasa sistema ko noong pero alam kong hindi naman alak ang nagdesisyon. Alak lang nagpalakas ng loob ko subukan ang ganon. Na naawa ako sa puta na kailangang gamitin ang espukikay niya para magkapera. Gusto ko sana ikwento na hindi ako nagpahalik o humalik. Na alam ko na ang ibig sabihin ng ganoong eksena sa mga R18 na napapanood natin.

Dahil hindi naman tayo nagkakwentuhan kahapon, isinulat ko na lamang ito sa espasyong ito para hindi makalimot.