Hindi pag-ibig ang prayoridad sa tag-init

Bumili ako ng isang malaking electric fan na 70 watts. At sa init ng panahon ngayon, himala na epektibong nakatulog ako sa aking kwarto ng halos buong araw. Ganyang kaswabe ang hangin niya. Sabi ng kasama ko sa bahay, itago ko raw ang warranty. Sabi ko, halos lahat naman ng mga nabibiling appliances parang disposable matapos ang dalawang taon, give or take. Hindi na siya nakipagdiskusyon.

Sa trabaho ko ngayon sa unibersidad, kinaya kong bumili ora mismo ng bagong pampalamig. Hindi malaki ang sweldo ko, pero kumpara sa mga dati kong pinagtatrabahuhan, masasabi kong mas maalwan ang buhay ko ngayon. Mas may seguridad nga magtrabaho sa gobyerno kesa sa pribadong sektor.

Kaya ko na rin tugunan ang gabi gabing malamig na serbesa lalo na kung tinatawag ng pagkakataon. O kaya ang pagbibigay ng maluwag kay ermats ng pera kapag biglang naglambing.

Palagay ko, nagagawa ko ang mga bagay na ito dahil kahit maliit lang ang sweldo ko bilang guro, payak lang ang lifestyle ko. Nagbabaon ng pagkain sa trabaho, kumain sa karinderya kasama ng mga kaibigang drayber at contruction worker, bumili ng damit sa dibisorya, pagtyagaan ang wala ng garter na medyas, at higit sa lahat walang syota.

Sabi ng ermats ko, kaya ko na raw bumuhay ng pamilya. Akala niya kasi dahil nakakapagbigay na ako sa kanya e kalakihan na ang sweldo ko. Akala niya rin kasi, sabik na akong mag-asawa.

Pero sa panahon ngayon na mas nana-narrow down ang field na gusto kong pagtrabahuhan at paglaanan ng halos apatnapung taon ng aking buhay bilang manggagawa, hindi ko naiisip ang pagpapamilya. O pag-aasawa. O pag-aanak. Kung anu man ang mauna. Sakit na nga ng ulo ang mabuhay sa kapitalistang mundo kung saan kelangan kumayod ng kumayod para mabuhay, maghahanap pa ba ako ng ibang iisipin?


Ang alam ko lang sa ngayon, masarap ang hangin na dala ng bago kong electric fan. At hindi ko nakikitang i-share ito sa iba. Sa panahon ngayon, mas importante na may swabeng hangin kesa sa relasyon. Mainit matulog na may katabi sa kama. O kayakap sa parke. O kaholding hands habang naglalakad at nagpapawis ang kamay, braso at leeg. Anytime of the day.

Tatanda nga yata akong binata.