Election afterthoughts

May dalawang bagay ka na hindi mo pa nahahanap. Una yung poster mo ni Dao Ming Si na pinilihan pa natin sa Ximending, Taipei para mapirmahan niya. Nawala noong February 21, 2003. Umiyak ka sa akin nun kasi pinag-ipunan natin ang trip sa concert ng F4, yung malapit sa stage at pwedeng magbackstage pass.

Yung pangalawa ay ang una mong kopya ng Si Nemo,ang Batang Papel. Binili mo yun noong Grade 3 ka. Barbie book ang pinapabili ng nanay mo pero yung libro na yun ang pinili mo nung dumating ang trak ng Adarna sa elementary school natin. Kapag binabasa mo yung kwento, sabay natin sinasabi ang, "Bituin, bituin, tuparin ngayon din. Ako'y gawing batang masayahin!" Yang linyang yan ang paulit-ulit sa kwento.

Hindi ko pa kilala si Rene Villanueva noon bilang magaling na manunulat. Di ko pa rin nadidinig ang tungkol sa prestihiyosong Palanca kung saan nanalo yung kwento na yun. Pero gusto mo yung librong yun. At natutuwa akong masaya tayong nagbabasa ng makulay na paper back na children's book na yun.

------------------------------------------------------------------

Matapos bomoto ng eleksyon lang ulit tayo nagkita. Matagal-tagal na rin simula ng binasted mo ako, nag-away tayo, nagbati, naging magbestfriend, nagkahiwalay ng kolehiyo, di na nagkita.

Maganda ka pa rin. Tumataba ako. Pero mabait ka kaya ang bati mo sa akin, "Looking good ka a!" Kung hindi lang awkward ang sitwasyon ng matagal ng di pagkikita, baka na-inlove ulit ako sayo. Ayan sana ihihirit ko pero baka mamisinterpret na may hang ups pako. Kaya kumindat na lang ako.

Kasama ng matamis na palamig at gulaman, nakwento mo sa akin na malapit ka na ikasal dun sa boyfriend mong hindi ko nakilala kasi lagi akong tumatanggi sa alok mong catch up talks. Sa August na pala ang kasal."Ang bilis!" sabi ko. Sabi mo matagal na yun. Hindi lang ako nagpapakita sayo. Ngumisi na lang ako.

------------------------------------------------------------------
"Yang si Kwan ikakasal na" sabi ni ermats. "Lahat ng mga kaibigan mo nagpapakasal na." "Oo nga e," yan lang ang sagot ko.

Tapos tahimik na ang lahat.

------------------------------------------------------------------
"Ako mamimili ng bestman. Ikaw ang bestman ha?" sabi mo sa teks kaninang umaga. Oo kaagad sagot ko. Sa kasal mo, ibabalik ko na yung libro na Nemo, ang Batang Papel na pinatago mo sa akin noon na nakalimutan mong kunin at naisip na tuluyang nawawala.Ikwekwento ko ang tungkol sa sabay nating pagbigkas ng "Bituin, bituin, tuparin ngayon din. Ako'y gawing batang masayahin!"

Natupad na ang hiling mo. At hiling ko.