Sa Cubao Expo makakakita ng vinyl records, rakstar na mga libro at overpriced na cookie

May exchange gift ang mga faculti sa departamento namin. Mamaya ang Christmas Party. Kahapon ng gabi lang ako nakabili ng regalo sa nabunot kong pangalan na bibigyan ng regalo. Ang sitwasyon ko ay ganito, humiling ang faculti na ito ng vinyl records. Oo ayun yung plaka na itim na pinapatugtog nung mga tao sa una.

Kaya naman halos kinabahan ako sa paghahanap ng ganoong mga plaka. Nakakita ako sa Cubao Expo, doon sa malapit sa Alimall. Sa Cubao Expo makikita ang mga thrift stores, bentahan ng mga sapatos na gawang Marikina, pati na ang mga mahusay na pinagpilian na mga nobela at nonfiction na mga aklat.

Kumuha ako ng tatlong vinyl records. Una ay yung Ruby, ruby (kay Gato Barbieri). Pangalawa ay A.M. (ng The Plunketts). Yung huli ay Caliente! (ni Gato Barbieri ulit). Masaya ako sa mga jazz album na napili ko. Ang alam ko kasi ay mahilig sa jazz music yung co-faculti ko na yun.

Nagustuhan ko yung karanasan hanapin ang vinyl records. Mahirap. At lalagyan talaga ng effort. Pero okay ang karanasan sa paghahanap. Pati na rin ang proseso ng pagpili ng records. 

Nagkaroon lang ng konting paghiling na sana may kasama ako na mag-eenjoy din sa proseso ng paghahanap ng lumang mga albums. Iyong tipong may kasabayan ako na nakikinig ng mga lumang musika na nililok sa mga itim na plaka.

Nung nag-emo shiz nako, bumili ako ng overpriced na cookie sa isa sa mga tindahan sa Cubao Expo. Singkwenta pesos isang cookie. Laspag ang pera pero wala na ang hayop na pagnanasa ng pag-ibig. Sulit.

Napabili rin ako ng dalawang libro na dalangin kong mabasa ngayong malapit na ang bakasyon sa unibersidad. Alam kong madami pa ang nakatengga ko na basahin sa tukador ko pero hindi ko mapigilan ang sarili nung nakita ko ang dalawang ito.

Yung una ay Timequake ni Kurt Vonnegot. Yung pangalawa ay Labyrinths ni Jorge Luis Borges. May pakiramdam ako na hindi siya madaling basahin kaya isasabay ko ang pagbabasa nito sa Plain Truth ni Jodi Picoult. Tingnan natin ang kakalabasan ng pagbabasa kong ito. Medyo matagal pa bago matapos ang trabaho ko sa unibersidad pero alam kong sabik nako na magbasa lang at hindi magtrabaho. Kumpara sa akala ng iba, maikli lang ang bakasyon namin. Pero nagpapasalamat pa rin ako at may ganitong bakasyon kumpara sa ibang career na walang bakasyon sa Kapaskuhan.

Basta alam ko, pag magbabasa ako ng libro, maglalagay akong mainit na tubig sa batyang malaki kung saan ako magbababad, magsisindi ng mabangong kandila, magpapatugtog ng bossa nova, at hihigop ng earl grey tea.

Ayan ang perpektong bakasyon para kay Palaboy.