Hubad sa malisya na diskusyon patungkol sa regla at tamod

Kahapon sa klase ko sa kolehiyo, pinag-usapan namin ang bayolohikal na pananaw ng puberty (pagdadalaginding, pagbibinatilyo). Para kaming nagrebyu ulit ng endocrine glands at mga hormones na pinag-aralan namin noong Grade 5 at Grade 6. Mas pinalalim lang ng kaunti dahil nagkaroon ng maikling diskusyon sa relasyon ng mga hormones sa mga pagbabagong pisikal na nararanasan sa edad ng puberty.

Naging interesting lalo ang usapan noong napasadahan namin ang dalawang termino: menarche (unang buwanang daloy sa mga babae) at spermache (unang paglabas ng tamod sa mga lalaki). Naikwento ko ang una kong karanasan ng wet dream at pati na rin ang una kong nakakatakot na karanasan sa pagsasalsal.

Dahil ako ang unang nagbukas sa mga bagets, naging maganda ang daloy ng paliwanagan sa kung ano ang sinasabi ng mga pag-aaral sa menarche at spermache at ano naman ang kanilang personal na karanasan. Naging malaya at ligtas ang atmosphere at walang kulay o nakakahiyang value ang mga salitang regla, tamod at erotic image.

Nasabi ng mga bagets na noon, wala silang masabihan na matanda. At ang kausap lang nila ay mga ka-edad nila na noon din lang naman naranasan ang menarche at spermache. Napag-usapan din ang mga pamahiin tulad ng:

• Kailangan na lumiktaw ng hakbang sa hagdan sa unang buwanang daloy para maiwasan ang disminoriya sa mga susunod na regla
• Kailangan ipahid sa pimple ang pinagbanlawan ng panty na may regla para hindi dumami ang tagihawat sa panahon ng pagdadalaga. 
• Na ang tamod ay maaaring ipahid sa chest at sa chin para mas mabilis ang pagkakaroon ng buhok sa mga parteng iyon. 
• Nagpapatangkad ang pagsasalsal. 

Sinabi nila na ngayon parang nakakatawa na lang yung ideya ng mga pamahiin pero ginawa nila ito noon dahil sabi ng mga matatanda.

Tinapos namin ang diskusyon noong may estudyanteng nagsabi na, "Noong binabalikan ko yung karanasan ko ngayon, parang ang babaw lang. Pero noong punto na yun, alam kong totoo ang pakiramdam ng shame.. Hiyang hiya ako noon." Sinabi ko sa kanila na maraming sensitibong bagay na nararanasan ang mga nagbibinata at nagdadalaga na sa ating mga mas matanda, pinagtatawanan natin o isinasantabi. Pero para sa mga binatilyo at mga dalaginding, totoong palundag ang pag-usad ng mga pagbabago sa katawan nila. Na nagdudulot ng iba-ibang emosyon. Hiya. Takot. Gulat. Supresa. Na kaming mga future na propesyonal na magha-handle ng mga indibidwal na nasa ganoong edad, kailangan sensitibo at handa na sumalo at tumulong sa mga kanila.

Sinabi ko na naappreciate ko ang mga bagets sa magandang talakayan.

Habang binabalikan ko ang naging usapan namin kahapon, naisip ko na pwede talagang pag-usapan ang mga maseselang bagay, kung hindi lalapatan ng malisya at klaro sa nagpapadaloy o guro ang values at objectives ng diskusyon.

Hindi ko pa talaga lubos na naisasabuhay ang mapagpalayang edukasyon, pero palagay ko may tapik ako sa balikat kung nakita ni Freire ang ginawa ko kahapon sa klase.