Matilda

Nabighani ako sayo sa mga kakaibang panlasa mo.

Mas gusto mo ang bigyan ka ng bulaklak ng makahiya kaysa rosas.

Lagi mong tinatali ang buhok mo kapag kasama ako para makita ang batok mong may tattoo na pinansin ko at sinabi kong maganda.

Okay lang na dalhin kita sa kainan ng mga taxi driver at kinaibigan mo pa ang kahera para may discount tayo kapag kakain tayo doon.

Hindi mo ako pinipilit manood ng rom-com pero nangunguna kang magyaya kapag may action film kang nakita na alam mong gusto ko.

Kinukumusta mo ang erpats, ermats ko minsan sa isang buwan.

Matik na ang pag-order mo ng cold sake para sa akin kapag pumapasok tayo ng Japanese restaurant.

Naseseksihan ako pag tinatawag mo akong guard at tinatawag kitang mam.

Ikaw lang ang nakakapagpapasok sa akin sa salon para hintayin ka sa pagpapagupit mo na tumatagal ng tatlong oras.

Inaalok mo ako na magstay muna sa fully booked kapag bibili ka ng sapatos o damit.

Pinagtitimpla mo ako ng kape kapag nakasubsob ako sa trabaho.

Kaya mo pa rin ako gulatin sa biglaan mong mahihigpit na yakap.

------------------------------------------

Salamat sa masasayang alaala. Makakalimutan din kita. Soon.