Iyon ang gabing parang tayong dalawa pero hindi

Inabutan mo ako kanina ng kape. Sabi ko, Mas maaappreciate ko ang red horse.

Sira! Tapusin mo na yang research proposal na yan, sabi mo. Sabay balik sa pagbabasa ng nobela ni Anne Rice tungkol sa mga madreng nagsusubok magligtas ng mga anghel sa mundo ng tao. 

Hinayaan mo lang ako magtrabaho sa espasyo ko sa hotel room natin sa Tagaytay.


Halos labing dalawang taon na ang nakaraan noong niligawan kita. At binasted mo ako. Una at huling pagpusta ko iyon sa pagkakaibigan natin. Hindi tayo nagkibuan ng limang linggo.

Nagkabati na lang tayo noong tumakbo ka sa akin na umiiyak dahil pinilit ka ng HE teacher natin noong highschool na gilitan ng leeg ang buhay na manok na dinala niya sa klase para lutuin ninyo. Ayaw mo pumatay ng manok. Niyakap lang kita. Umiyak ka lang.

Nang mahimasmasan ka, sinabi mo, Sorry ha.

Sumagot ako ng, Sorry din.

Nakakatawa kung paanong ngayon lang ulit tayo nagkita matapos nating grumadweyt sa highschool. Sa kasal ng barkada natin. Abay ka. Ako naman ay regular na bisita lang. Matapos ang kasal ng kaibigan natin, nagkayayaan tayo na maghotel. Para tumagal pa ng isang araw ang paglagi natin sa Tagaytay. Para masulit lang ang weekend bago bumalik sa tunay nating mga buhay. Ikaw, sa isang IT company sa labas ng bansa. Ako sa unibersidad sa may Kamaynilaan.

Habang nagsusulat ako laptop, bigla mong sinabi, Gusto ko ng balot. Pabiro kitang tinanong kung naglilihi ka ba? Sinagot mo ako ng, Ulol! 

Lumabas tayo kahit hating gabi na. Walang taxi sa Tagaytay. Wala ring mga jeep at tricycle sa disoras ng gabi. Nilakad natin ang madilim na highway para hanapin ang balot mo. Tinanong kita kung kumusta na kayo ng boyfriend mo. Sabi mo, Okay lang naman. Tinanong kita kung kelan niyo balak magpakasal.. Sabi mo, Wala pa yata siyang plano. Mahina loob noon na gumawa ng mabibigat na desisyon. Nagkomento lang ako na, Tumatanda na tayo. Niyakap mo ang kaliwa kong braso at sinabing, Alam ko. Pero mahal ko yung boyfriend kong yon. Kaya pa namang maghintay.

Nabili natin ang balot mo. Bumalik tayo sa hotel room. At natulog sa magkahiwalay na kama.